ವಿಶ್ವಕರ್ಮ ಜಯಂತಿ ಉತ್ಸವದ ಆಚರಣೆ ಇಂಡಿಯಾನಗರದಲ್ಲಿ

ವಿಶ್ವಕರ್ಮ ಜಯಂತಿ ಉತ್ಸವದ ಅಂಗವಾಗಿ, ಅಖಿಲ ಕರ್ನಾಟಕ ವಿಶ್ವಕರ್ಮ ಮಹಾಸಭಾದಿಂದ ಇಂಡಿಯಾನಗರದಲ್ಲಿ ಮೆರವಣಿಗೆ ಆಯೋಜಿಸಲಾಯಿತು. ಈ ಮೆರವಣಿಗೆಯಲ್ಲಿ ಮಠದಹೊನ್ನಾಯಕನಹಳ್ಳಿ ಮಂಟೇಸ್ವಾಮಿ ಬಸವಪ್ಪ ಮತ್ತು ಎಸ್.ಐ. ಹಾಗಲಹಳ್ಳಿ ಸಿದ್ದಪ್ಪಾಜಿ ಬಸವಪ್ಪರ ಮೆರವಣಿಗೆಯನ್ನು ನಡೆಸಲಾಯಿತು. ಚಾಮುಂಡೇಶ್ವರಿ ದೇವಾಲಯದ ಆವರಣದಲ್ಲಿ ಬಸವಪ್ಪಗಳಿಗೆ ಹೂ-ಹೊಂಬಾಳೆ ಪೂಜೆ ನೆರವೇರಿಸಿ, ಚಾಮುಂಡೇಶ್ವರಿ ದೇವಿಗೆ ವಿಶೇಷ ಪೂಜೆ ಸಲ್ಲಿಸಿದ ನಂತರ ಬಸವಪ್ಪಗಳನ್ನು ಮದ್ದೂರು-ಮಳವಳ್ಳಿ ಮುಖ್ಯ ಹೆದ್ದಾರಿಯಲ್ಲಿ ಮೆರವಣಿಗೆ ಮಾಡಲಾಯಿತು. ಈ ಮೆರವಣಿಗೆಯಲ್ಲಿ ಅಜ್ಜಹಳ್ಳಿ, ಮೆಣಸಗೆರೆ ಮತ್ತು ಕಾಡುಕೊತ್ತನಹಳ್ಳಿ ಗ್ರಾಮಗಳ ಕಂಡಾಯಗಳು ಪಾಲ್ಗೊಂಡಿದ್ದವು. ಮದ್ದೂರು ತಾಲ್ಲೂಕು ಸಂಘಟನಾ ಕಾರ್ಯದರ್ಶಿ ರವಿಪ್ರಸಾದ್ ಆಚಾರ್ ಅವರು ವಿಶ್ವಕರ್ಮ ಸಮುದಾಯದ ಅನುಕೂಲಕ್ಕಾಗಿ ಮದ್ದೂರು ಶಾಸಕರು ನಿವೇಶನ ಕೊಡಿಸಿ ಭವನ ನಿರ್ಮಾಣ ಮಾಡಿಕೊಡಬೇಕೆಂದು ಆಗ್ರಹಿಸಿದರು. ವಿಶ್ವಕರ್ಮ ಮಹಾಸಭಾದ ಅಧ್ಯಕ್ಷ ಕೃಷ್ಣಮೂರ್ತಿ, ಮುಖಂಡರಾದ ಚಿಕ್ಕಣ್ಣಚಾರಿ, ಪ್ಲೈವುಡ್ ಶೇಖರ್, ಮಂಜು, ಬೆಳ್ಳೂರು ಮನು, ಸುಮಂತ್, ಬೆಂಗಳೂರು ಪವಿತ್ರಾಚಾರ್ ಅವರು ಉಪಸ್ಥಿತರಿದ್ದರು.