ಬೆಂಗಳೂರಿನಲ್ಲಿ ತಂದೆಯಿಂದ ಹಣ ವಸೂಲಿಗೆ ಮಗ ಕಿಡ್ನ್ಯಾಪ್ ನಾಟಕವಾಡಿದ ಘಟನೆ
ಬೆಂಗಳೂರಿನಲ್ಲಿ ಅಕ್ಟೋಬರ್ 02 ರಂದು, ಮಗನಿಂದ ತಂದೆಯಿಂದ ಹಣ ವಸೂಲಿಗೆ ಕಿಡ್ನ್ಯಾಪ್ ನಾಟಕವಾಡಿದ ಘಟನೆ ನಡೆದಿದೆ. ಸೆ.29ರಂದು ಮನೀಷ್ ತಂದೆ ಮನೋಹರ್ ಪಾಟೀಲ್ ಅವರಿಗೆ ಮನೀಷ್ ಮೊಬೈಲ್‌ನಿಂದ ವಾಟ್ಸಾಪ್ ಕರೆ ಮಾಡಿದ ಗ್ಯಾಂಗ್, ಮಗನ ಕಿಡ್ನ್ಯಾಪ್ ಮಾಡಿದ್ದಾರೆ ಎಂದು 90 ಲಕ್ಷ ರೂ. ಹಣಕ್ಕೆ ಡಿಮ್ಯಾಂಡ್ ಮಾಡಿತ್ತು. ಹಣದ ವ್ಯವಹಾರಕ್ಕಾಗಿ ಗದಗಕ್ಕೆ ಹೋಗುತ್ತೇನೆ ಎಂದು ಮನೆಯಿಂದ ತೆರಳಿದ್ದ ಮನೀಷ್, ಬೆಳಗ್ಗೆ ಫೋನ್ ಮಾಡುತ್ತೇನೆ ಎಂದು ಹೇಳಿದ್ದ. ಈ ನಡುವೆ ಬಂದ ಕಿಡ್ನ್ಯಾಪ್ ಕರೆಯಿಂದ ಮನೋಹರ್ ಬೆಚ್ಚಿಬಿದ್ದು, ತಕ್ಷಣ ಆರ್.ಆರ್.ನಗರ ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಪೊಲೀಸರು ಮನೀಷ್ ಮೊಬೈಲ್ ಟ್ರ್ಯಾಕ್ ಮಾಡಿದಾಗ ಸ್ವಿಚ್ ಆಫ್ ಬಂದಿದೆ. ಬಳಿಕ ಬೇರೊಂದು ನಂಬರ್‌ನಿಂದ ಹಣ ಅರೆಂಜ್ ಆಯ್ತಾ ಎಂದು ಕರೆ ಬಂದಿದ್ದು, ಆ ನಂಬರ್ ಟ್ರ್ಯಾಕ್ ಮಾಡಿ ಹಾಸನ ಭಾಗದಲ್ಲಿ ಪೊಲೀಸರು ಹುಡುಕಾಡಿದ್ದರು. ಈ ವೇಳೆ ಇಬ್ಬರು ಸ್ನೇಹಿತರ ಜೊತೆ ಆರಾಮಾಗಿ ಮನೀಷ್ ಮಲಗಿರೋದು ಕಂಡುಬಂದಿದೆ. ಮನೀಷ್ ಸೇರಿ ಮೂವರನ್ನ ವಶಕ್ಕೆ ಪಡೆದು ವಿಚಾರಿಸಿದಾಗ ಕಿಡ್ನ್ಯಾಪ್ ನಾಟಕ ಬಯಲಾಗಿದೆ. ಎಲೆಕ್ಟ್ರಿಕ್ ಕಂಟ್ರಾಕ್ಟ್‌ಗೆ ಮನೀಷ್ 1.5 ಕೋಟಿ ಸಾಲ ಮಾಡಿಕೊಂಡಿದ್ದ. ಈ ಸಾಲ ತೀರಿಸಲು ಕಿಡ್ನ್ಯಾಪ್ ನಾಟಕವಾಡಿದ್ದಾಗಿ ಆತ ತಪ್ಪೊಪ್ಪಿಕೊಂಡಿದ್ದಾನೆ ಎನ್ನಲಾಗಿದೆ.
