ಸಿಂಗಾಪುರದಲ್ಲಿ ಬೆಂಗಳೂರಿನ ಕೈಗಾರಿಕಾ ವಲಯಕ್ಕೆ ಹೂಡಿಕೆ ಅವಕಾಶಗಳ ಕುರಿತು ಮಾತುಕತೆ ನಡೆಸಿದ ಸಚಿವರು

ಕೈಗಾರಿಕಾ ಸಚಿವರು ಎಂ.ಬಿ. ಪಾಟೀಲ ಅವರು ಸಿಂಗಾಪುರದಲ್ಲಿ ಟಕ್ರಾಲ್ ಕಾರ್ಪೊರೇಷನ್, ನಾರ್ಡಿಕ್ ಫ್ಲೋ ಕಂಟ್ರೋಲ್, ಜಾಪ್ಫಾ, ಎಸ್ಎಟಿಎಸ್ ಮತ್ತು ಎಸ್.ಟಿ ಎಂಜಿನಿಯರಿಂಗ್ ಕಂಪನಿಗಳ ಪ್ರತಿನಿಧಿಗಳೊಂದಿಗೆ ಚರ್ಚೆ ನಡೆಸಿದರು. ಅವರು ಸಿಂಗಾಪುರ ಭಾರತೀಯ ವಾಣಿಜ್ಯ ಮತ್ತು ಕೈಗಾರಿಕಾ ಒಕ್ಕೂಟದ (ಎಸ್ಐಸಿಸಿಐ) ಪ್ರತಿನಿಧಿಗಳೊಂದಿಗೆ ವಿಚಾರ ವಿನಿಮಯ ನಡೆಸಿದರು. ಬೆಂಗಳೂರಿನಲ್ಲಿ ಕಾರ್ಗೋ ನಿರ್ವಹಣೆ, ಶೀತಲಗೃಹಗಳು, ಏರ್‌ಪೋರ್ಟ್‌ ಲಾಜಿಸ್ಟಿಕ್ಸ್ ಮತ್ತು ಉಗ್ರಾಣಗಳಲ್ಲಿ ಕಾರ್ಯನಿರ್ವಹಿಸುವ ಎಸ್ಎಟಿಎಸ್ ತನ್ನ ಸಾಮರ್ಥ್ಯ ವಿಸ್ತರಣೆಗೆ ಆಸಕ್ತಿ ತೋರಿದೆ. ಪಶು ಆಹಾರ ತಯಾರಿಕೆ ಮತ್ತು ಆಹಾರ ಸಂಸ್ಕರಣೆ ಕ್ಷೇತ್ರದ ಜಾಪ್ಫಾ ಕಂಪನಿಯು ರಾಜ್ಯದಲ್ಲಿ ಫೀಡ್ ಮಿಲ್ ಮತ್ತು ಆಹಾರ ಸಂಸ್ಕರಣೆ ಸ್ಥಾವರ ನಿರ್ಮಾಣಕ್ಕೆ ಆಸಕ್ತಿ ತೋರಿದೆ.