ನಮ್ಮ ಮೆಟ್ರೋದಲ್ಲಿ ಬುಧವಾರ ಜೀವಂತಹೃದಯ ಸಾಗಾಟ ಮಾಡಲಾಯಿತು

ಗೊರಗುಂಟೆಪಾಳ್ಯದ ಸ್ಪರ್ಶ್ ಆಸ್ಪತ್ರೆಯಿಂದ ಮಂತ್ರಿ ಸ್ಕ್ವೇರ್ ಬಳಿಯ ಅಪೊಲೊ ಆಸ್ಪತ್ರೆಗೆ ಬುಧವಾರ ಜೀವಂತಹೃದಯವನ್ನು ನಮ್ಮ ಮೆಟ್ರೋದಲ್ಲಿ ಸಾಗಿಸಲಾಯಿತು. ವಾಹನದಟ್ಟಣೆಯಲ್ಲಿ ಸಾಗಾಟವು ವಿಳಂಬವಾಗುವ ಸಾಧ್ಯತೆ ಇದ್ದ ಕಾರಣ ವೈದ್ಯರು ಮೆಟ್ರೋದಲ್ಲಿ ಸಾಗಿಸಲು ನಿರ್ಧರಿಸಿದರು. ಮಧ್ಯಾಹ್ನ 2.20ಕ್ಕೆ ಹೃದಯವನ್ನು ಗೊರಗುಂಟೆಪಾಳ್ಯ ಮೆಟ್ರೊ ನಿಲ್ದಾಣಕ್ಕೆ ತರಲಾಯಿತು. ಬಿಎಂಆರ್‌ಸಿಎಲ್‌ ಸಿಬ್ಬಂದಿ ಮತ್ತು ಆಸ್ಪತ್ರೆಯ ವೈದ್ಯರ ತಂಡದ ಸದಸ್ಯರು 2.22ಕ್ಕೆ ಮೆಟ್ರೋ ರೈಲಿನೊಳಗೆ ಹೃದಯವನ್ನು ತಂದರು. 18 ನಿಮಿಷದಲ್ಲಿ ಮಂತ್ರಿ ಸ್ಕ್ವೇರ್ ನಿಲ್ದಾಣಕ್ಕೆ ತಲುಪಿದ್ದು, ಅಲ್ಲಿ ತುರ್ತು ವಾಹನದ ಮೂಲಕ ಅಪೊಲೊ ಆಸ್ಪತ್ರೆಗೆ ಸಾಗಿಸಲಾಯಿತು. ಬುಧವಾರ ನಡೆದ ಹೃದಯ ಸಾಗಾಟವೂ ಸೇರಿದಂತೆ ಇಲ್ಲಿಯವರೆಗೆ ಮೆಟ್ರೋದಲ್ಲಿ ಆರು ಜೀವದಾನಿ ಅಂಗಗಳನ್ನು ಸಾಗಿಸಲಾಗಿದೆ. ಇದರಲ್ಲಿ ಒಂದು ಯಕೃತ್ತು, ಮೂರು ಹೃದಯಗಳು ಮತ್ತು ಒಂದು ಜೋಡಿ ಶ್ವಾಸಕೋಶಗಳು ಸೇರಿವೆ ಎಂದು ಬಿಎಂಆರ್‌ಸಿಎಲ್‌ ಅಧಿಕಾರಿಗಳು ತಿಳಿಸಿದ್ದಾರೆ.