ಕಾನ್ರಾಡ್ ಪಂಚತಾರಾ ಹೋಟೆಲ್ ಘಟನೆಯಲ್ಲಿ ನಾಲ್ವರು ಸಿಬ್ಬಂದಿ ಬಂಧನ

ಪೂಲ್‌ನಲ್ಲಿ ವಿದ್ಯುತ್ ಪ್ರವಹಿಸಿ ಇಬ್ಬರು ವಿದೇಶಿಯರು ಮೃತಪಟ್ಟ ಘಟನೆ ಕುರಿತು ತನಿಖೆ ನಡೆಸುತ್ತಿರುವ ಹಲಸೂರು ಠಾಣೆ ಪೊಲೀಸರು, ಕಾನ್ರಾಡ್ ಪಂಚತಾರಾ ಹೋಟೆಲ್‌ನ ಎಂಜಿನಿಯರಿಂಗ್ ವಿಭಾಗದ ನಾಲ್ವರು ಸಿಬ್ಬಂದಿಯನ್ನು ಬಂಧಿಸಿದ್ದಾರೆ. ಬಂಧಿಸಲಾದ ಸಿಬ್ಬಂದಿಯಲ್ಲಿ ಇಬ್ಬರು ಸಹಾಯಕ ಎಂಜಿನಿಯರ್‌ಗಳು, ಸಹಾಯಕ ಮುಖ್ಯ ಎಂಜಿನಿಯರ್‌ ಮತ್ತು ಒಬ್ಬ ತಂತ್ರಜ್ಞನಿದ್ದಾರೆ. ಸಿಬ್ಬಂದಿಯ ನಿರ್ಲಕ್ಷ್ಯವೇ ದುರಂತಕ್ಕೆ ಕಾರಣವಾಗಿದ್ದು, ಈಜುಕೊಳದ ದೀಪಗಳ ವೈರಿಂಗ್‌ನಿಂದ ವಿದ್ಯುತ್‌ ಸೋರಿಕೆಯಾಗಿ ಅವಘಡ ಸಂಭವಿಸಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಘಟನೆಯಲ್ಲಿ ಗಾಯಗೊಂಡ ಅಮೆರಿಕದ ಮ್ಯಾಥ್ಯು (41) ಮತ್ತು ಈಜುಕೊಳದ ಲೈಫ್‌ಗಾರ್ಡ್ ರಾಹುಲ್ ತಿವಾರಿ (28) ಅವರ ಹೇಳಿಕೆ ದಾಖಲಿಸಿಕೊಳ್ಳಲಾಗಿದೆ.