ದಿನಿಧಿ ದೇಸಿಂಗು ಯುವ ಒಲಿಂಪಿಕ್ಸ್‌ನಲ್ಲಿ 'ಪದಕ ಡಬಲ್‌' ಗೆಲ್ಲಲು ಯಶಸ್ವ; ತನ್ವಿ ಪತ್ರಿ ಐತಿಹಾಸಿಕ ಸಾಧನೆ

ಬೆಂಗಳೂರಿನ ದಿನಿಧಿ ದೇಸಿಂಗು ಅವರು ಯುವ ಒಲಿಂಪಿಕ್ಸ್‌ನಲ್ಲಿ ಬಾಲಕಿಯರ 200 ಮೀಟರ್ ಫ್ರೀಸ್ಟೈಲ್ ಸ್ಪರ್ಧೆಯಲ್ಲಿ ಕಂಚಿನ ಪದಕ ಗೆಲ್ಲುವ ಮೂಲಕ 'ಪದಕ ಡಬಲ್‌' ಮಾಡಿಕೊಂಡರು. 16 ವರ್ಷದ ದಿನಿಧಿ ಅವರು ಯುವ ಒಲಿಂಪಿಕ್ಸ್‌ನ ವೈಯಕ್ತಿಕ ಸ್ಪರ್ಧೆಗಳಲ್ಲಿ ಎರಡು ಪದಕ ಗೆದ್ದ ಭಾರತದ ಮೊದಲ ಕ್ರೀಡಾಪಟು ಎಂಬ ಹೆಗ್ಗಳಿಕೆಗೂ ಪಾತ್ರರಾದರು. ಮತ್ತೊಂದೆಡೆ, ಒಡಿಶಾದ ತನ್ವಿ ಪತ್ರಿ ಅವರು ಯುವ ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದ ಭಾರತದ ಮೊದಲ ಬ್ಯಾಡ್ಮಿಂಟನ್ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಗುರುವಾರ ನಡೆದ ಮಹಿಳಾ ಸಿಂಗಲ್ಸ್‌ ಫೈನಲ್‌ನಲ್ಲಿ 15 ವರ್ಷದ ತನ್ವಿ, ಜೂನಿಯರ್ ವಿಶ್ವ ಚಾಂಪಿಯನ್ ಯಿ ಷಿನ್ ಝಾಂಗ್ ವಿರುದ್ಧ ಸೋಲನುಭವಿಸಿದರೂ ಚಾರಿತ್ರಿಕ ಸಾಧನೆ ಮಾಡಿದರು.