ಇಂದಿರಾನಗರದಲ್ಲಿ ನೀರು ಅಸಮರ್ಪಕ ಪೂರೈಕೆ: ರಸ್ತೆ ತಡೆದು ಪ್ರತಿಭಟನೆ

ಇಂದಿರಾನಗರದಲ್ಲಿ ನೀರು ಅಸಮರ್ಪಕ ಪೂರೈಕೆ: ರಸ್ತೆ ತಡೆದು ಪ್ರತಿಭಟನೆ

ಬಸವನಬಾಗೇವಾಡಿ ಪುರಸಭೆ ವ್ಯಾಪ್ತಿಯ ವಾರ್ಡ್ ಸಂಖ್ಯೆ 21ರ ಇಂದಿರಾನಗರದಲ್ಲಿ ಹತ್ತು ದಿನಗಳಿಂದ ಕುಡಿಯುವ ನೀರು ಪೂರೈಕೆಯಾಗದ ಹಿನ್ನೆಲೆಯಲ್ಲಿ ನಿವಾಸಿಗಳು ಗುರುವಾರ ಬಕೆಟ್‌, ಬಿಂದಿಗೆಗಳನ್ನು ತಲೆ ಮೇಲೆ ಹೊತ್ತು ಬಸವನಬಾಗೇವಾಡಿ– ನಿಡಗುಂದಿ ಮುಖ್ಯ ರಸ್ತೆಯಲ್ಲಿ ಪ್ರತಿಭಟನೆ ನಡೆಸಿದರು. ಕರ್ನಾಟಕ ರಕ್ಷಣಾ ವೇದಿಕೆ ಮುಖಂಡ ಅಶೋಕ ಹಾರಿವಾಳ ಮತ್ತು ರೈತ ಸಂಘದ ರಾಜ್ಯ ಉಪಾಧ್ಯಕ್ಷ ಕಲ್ಲು ಸೊನ್ನದ ಮಾತನಾಡಿ, ಇಂದಿರಾನಗರ ಸೇರಿದಂತೆ ಪುರಸಭೆ ವ್ಯಾಪ್ತಿಯ ಎಲ್ಲ 23 ವಾರ್ಡ್‌ಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ತೀವ್ರಗೊಂಡಿದೆ ಎಂದು ಆರೋಪಿಸಿದರು. ತಹಶೀಲ್ದಾರ್ ವೈ.ಎಸ್. ಸೋಮನಕಟ್ಟಿ ಮತ್ತು ಪೊಲೀಸ್ ಇನ್‌ಸ್ಪೆಕ್ಟರ್ ಗುರುಶಾಂತ ದಾಶ್ಯಾಳ ಸ್ಥಳಕ್ಕೆ ಆಗಮಿಸಿ, ಶುಕ್ರವಾರ ಸಂಜೆಯೊಳಗೆ ನೀರು ಪೂರೈಸಲು ಭರವಸೆ ನೀಡಿದ ಬಳಿಕ ಪ್ರತಿಭಟನಕಾರರು ರಸ್ತೆ ತಡೆ ಹಿಂಪಡೆದರು.