ಅಳ್ನಾವರದಲ್ಲಿ ನವರಾತ್ರಿ ಉತ್ಸವದ ಭವ್ಯ ಮೆರವಣಿಗೆಯೊಂದಿಗೆ ಮುಕ್ತಾಯ

ಅಳ್ನಾವರದಲ್ಲಿ ನವರಾತ್ರಿ ಉತ್ಸವವು ಭವ್ಯ ಮೆರವಣಿಗೆಯೊಂದಿಗೆ ಮುಕ್ತಾಯಗೊಂಡಿತು. ಪಟ್ಟಣದ ವಿವಿಧ ಬಡಾವಣೆಗಳಲ್ಲಿ ಒಂಭತ್ತು ದಿನಗಳ ಕಾಲ ಪೂಜಿಸಲಾದ ಶಕ್ತಿ ದೇವಿಯರ ಮೂರ್ತಿಗಳ ವಿಸರ್ಜನಾ ಮೆರವಣಿಗೆ ನಡೆಯಿತು. ವಿದ್ಯುತ್ ದೀಪಗಳ ಅಲಂಕಾರ, ಭಕ್ತಿಗೀತೆಗಳ ಗಾಯನ, ದೇವಿಯ ಜಯಘೋಷ, ಬಂಡಾರ ಓಕುಳಿ ಹಾಗೂ ದಾಂಡಿಯಾ, ಗರ್ಬಾ ನೃತ್ಯಗಳ ಸಂಭ್ರಮದೊಂದಿಗೆ ನವರಾತ್ರಿ ಉತ್ಸವಕ್ಕೆ ತೆರೆ ಬಿದ್ದಿತು. ಅಂಬಾ ಭವಾನಿ ಮಹಿಳಾ ಮಂಡಳಿಯ ವತಿಯಿಂದ ವಾಟರ್ ಟ್ಯಾಂಕ್ ರಸ್ತೆಯಲ್ಲಿ ದೇವಿಗೆ ವಿಶೇಷ ಪೂಜೆ ಸಲ್ಲಿಸಲಾಯಿತು. ಇಂದಿರಾನಗರ ಬಡಾವಣೆಯಲ್ಲಿ ದುರ್ಗಾಮಾತಾ ಉತ್ಸವ ಸಮಿತಿಯ ವತಿಯಿಂದ ಪೂಜೆ ಸಲ್ಲಿಸಿದ ಬಳಿಕ ಭವ್ಯ ಮೆರವಣಿಗೆ ನಡೆಯಿತು. ಮೇದಾರ ಓಣಿ, ಶಿವಾಜಿ ರಸ್ತೆ ಹಾಗೂ ಕಾಳೆ ಪ್ಲಾಟ್‍ಗಳಲ್ಲಿ ಪ್ರತಿಷ್ಠಾಪಿಸಲಾಗಿದ್ದ ಮೂರ್ತಿಗಳನ್ನೂ ಮೆರವಣಿಗೆ ಮೂಲಕ ವಿಸರ್ಜಿಸಲಾಯಿತು.