ಸಾಧು ವೇಷದಲ್ಲಿ ಹಣ ಸಂಗ್ರಹ: ಇಬ್ಬರ ಬಂಧನ

ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ (ಕೆಐಎ) ವಿವಿಧ ನೆಪ ಹೇಳಿ ಪ್ರಯಾಣಿಕರಿಂದ ಹಣ ಸಂಗ್ರಹಿಸುತ್ತಿದ್ದ ಆರೋಪದ ಮೇಲೆ ಇಬ್ಬರನ್ನು ಭದ್ರತಾ ಸಿಬ್ಬಂದಿ ವಶಕ್ಕೆ ಪಡೆದು ಪೊಲೀಸರಿಗೆ ಒಪ್ಪಿಸಿದ್ದಾರೆ. ಪ್ರತೀಕ್ ಭಾಟಿಯಾ ಹಾಗೂ ಮಾಡೆಲಾ ವೆಂಕಟ ದಿನೇಶ್ ಕುಮಾರ್ ಬಂಧಿತರು. ವಿಮಾನ ನಿಲ್ದಾಣದ ಟರ್ಮಿನಲ್‌–2ರಲ್ಲಿ ಈ ಇಬ್ಬರು ಅ.15,16 ರಂದು ಪ್ರತ್ಯೇಕವಾಗಿ ಕಾವಿ ಬಟ್ಟೆ, ಮಾಲೆ ಹಾಕಿಕೊಂಡು ಸಾಧುಗಳು ಕಾಣುವಂತೆ ಧಿರಿಸು ಧರಿಸಿ ಪರ್ಸ್ ಕಳೆದುಹೋಗಿದೆ ಅಥವಾ ಪರೀಕ್ಷೆಗೆ ತೆರಳಲು ಹಣ ಬೇಕಾಗಿದೆ ಎಂದು ಹೇಳಿ ಪ್ರಯಾಣಿಕರಿಂದ ಹಣ ಪಡೆಯಲು ಯತ್ನಿಸುತ್ತಿದ್ದರು. ಇಬ್ಬರೂ ಈ ಹಿಂದೆಯೂ ಇದೇ ರೀತಿಯ ಚಟುವಟಿಕೆ ನಡೆಸಿದ್ದರು. ಕ್ಯೂಆರ್ ಕೋಡ್ ಮೂಲಕವೂ ಹಣ ಸಂಗ್ರಹಿಸಲು ಪ್ರಯತ್ನಿಸಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕರಿಗೆ ತೊಂದರೆ ಉಂಟುಮಾಡುವ ಹಾಗೂ ಅನುಮತಿ ಇಲ್ಲದೆ ಹಣ ಸಂಗ್ರಹಿಸುವ ಚಟುವಟಿಕೆಗಳನ್ನು ತಡೆಯಲು ಭದ್ರತಾ ನಿಗಾ ಹೆಚ್ಚಿಸಲಾಗಿದೆ.