ಬೆಂಗಳೂರು-ತುಮಕೂರು 4 ಪಥದ ರೈಲ್ವೆ ಯೋಜನೆಗೆ ಇನ್ನೂ ಆಗದ ಭೂಸ್ವಾಧೀನ, ಸರ್ಕಾರದ ಸಹಕಾರಕ್ಕೆ ಕಾಯುತ್ತಿರುವ ರೈಲ್ವೇಸ್‌

ರಾಜಧಾನಿ ಬೆಂಗಳೂರು ಮತ್ತು ನೆರೆ ಜಿಲ್ಲೆ ತುಮಕೂರು ನಡುವಿನ ರೈಲ್ವೆ ಸಂಪರ್ಕವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯುವ ಉದ್ದೇಶ ಹೊಂದಿರುವ ಬಹುನಿರೀಕ್ಷಿತ 'ಬೆಂಗಳೂರು-ತುಮಕೂರು ಚತುಷ್ಪಥ (4 ಪಥಗಳ) ರೈಲ್ವೆ ಯೋಜನೆ'ಯ ಭೂಸ್ವಾಧೀನ ಪ್ರಕ್ರಿಯೆ ಹಂತಕ್ಕೆ ಬಂದಿದೆ. ಕಾಮಗಾರಿ ಸಮಯಕ್ಕೆ ಸರಿಯಾಗಿ ಪೂರ್ಣಗೊಳ್ಳಲು ನೈಋತ್ಯ ರೈಲ್ವೆ (SWR) ಇದೀಗ ಸಂಪೂರ್ಣವಾಗಿ ಕರ್ನಾಟಕ ಸರ್ಕಾರದ ಸಹಕಾರವನ್ನು ನೆಚ್ಚಿಕೊಂಡಿದೆ. ಭೂಸ್ವಾಧೀನ ಪ್ರಕ್ರಿಯೆಯನ್ನು ತ್ವರಿತಗೊಳಿಸುವ ಸಲುವಾಗಿ ಕೇಂದ್ರ ರೈಲ್ವೆ ಸಚಿವಾಲಯವು ಈ 4 ಪಥಗಳ ಯೋಜನೆಗೆ ವಿಶೇಷ ರೈಲ್ವೆ ಯೋಜನೆ' (Special Railway Project - SRP) ಎಂಬ ಅಧಿಕೃತ ಮಾನ್ಯತೆ ನೀಡಿದೆ. ಈ ಯೋಜನೆಗಾಗಿ ಮೂರು ಜಿಲ್ಲೆಗಳ ವ್ಯಾಪ್ತಿಯಲ್ಲಿ ಬರುವ ಒಟ್ಟು 51 ಹಳ್ಳಿಗಳನ್ನು ಅಧಿಕೃತವಾಗಿ ಗುರುತಿಸಿ ಅಧಿಸೂಚನೆ ಹೊರಡಿಸಲಾಗಿದೆ.