ಬಸವನಗರ ಮುಖ್ಯರಸ್ತೆಯಲ್ಲಿ 20 ದಿನ ವಾಹನ ಸಂಚಾರ ಮಾರ್ಪಾಡು

ಜಿಬಿಎ ವತಿಯಿಂದ ವಿಭೂತಿಪುರ ಕೆರೆಯ ಕಾಲುವೆಗೆ ಸೇತುವೆ ನಿರ್ಮಾಣ ಕಾಮಗಾರಿ ಕೈಗೆತ್ತಿಕೊಂಡಿದ್ದು, ಬಸವನಗರ ಮುಖ್ಯರಸ್ತೆಯಲ್ಲಿ ಅ.10ರಿಂದ 20 ದಿನ ವಾಹನ ಸಂಚಾರ ಮಾರ್ಪಾಡು ಮಾಡಲಾಗಿದೆ. ಮಾರತ್‌ಹಳ್ಳಿ, ಎಚ್‌ಎಎಲ್, ವಿಭೂತಿಪುರ ಹಾಗೂ ಬಸವನಗರ ಕಡೆಯಿಂದ ವಿಜ್ಞಾನನಗರ, ಕಗ್ಗದಾಸಪುರ, ಮಲ್ಲೇಶಪಾಳ್ಯ, ಬಿಇಎಂಎಲ್‌ ಕಡೆಗೆ ಹೋಗುವ ಭಾರಿ ಸರಕು ಸಾಗಣೆ ವಾಹನ(ಎಚ್‌ಜಿವಿ), ಬಿಎಂಟಿಸಿ ಬಸ್‌, ಶಾಲಾ ಬಸ್‌ ಹಾಗೂ ಲಘು ಸರಕು ವಾಹನಗಳ(ಎಲ್‌ಬಿವಿ) ಸಂಚಾರವನ್ನು ತಾತ್ಕಾಲಿಕವಾಗಿ ನಿರ್ಬಂಧಿಸಲಾಗಿದೆ. ವಿಜ್ಞಾನ ನಗರ, ಕಗ್ಗದಾಸಪುರ, ಮಲ್ಲೇಶಪಾಳ್ಯ, ಬಿಇಎಂಎಲ್‌ ಕಡೆಯಿಂದ ವಿಭೂತಿಪುರ, ಬಸವನಗರ, ಎಚ್‌ಎಎಲ್, ಮಾರತ್‌ಹಳ್ಳಿ ಕಡೆಗೆ ಸಾಗುವ ಎಲ್ಲ ರೀತಿಯ ವಾಹನಗಳ ಸಂಚಾರವನ್ನು ತಾತ್ಕಾಲಿಕವಾಗಿ ನಿರ್ಬಂಧಿಸಲಾಗಿದೆ.