ಬೆಂಗಳೂರಿನ ಒಣಹಣ್ಣು ಕಳ್ಳತನ ಪ್ರಕರಣ: ರಾಜಸ್ಥಾನದ ಮೂವರ ಬಂಧನ

ಬೆಂಗಳೂರಿನ ನ್ಯೂ ತರಗುಪೇಟೆಯ ಅಂಗಡಿ ಯೊಂದಕ್ಕೆ ನುಗ್ಗಿ ಒಣಹಣ್ಣು ಕಳ್ಳತನ ಮಾಡಿದ್ದ ರಾಜಸ್ಥಾನದ ಮೂವರನ್ನು ವಿ.ವಿ ಪುರ ಠಾಣೆಯ ಪೊಲೀಸರು ಬಂಧಿಸಿದ್ದಾರೆ. ಕೈಲಾಶ್, ದಿಲೀಪ್ ಮತ್ತು ಓಂ ಪ್ರಕಾಶ್ ಎಂಬವರನ್ನು ಬಂಧಿತರನ್ನಾಗಿ ಮಾಡಲಾಗಿದೆ. ಮತ್ತೊಬ್ಬ ಆರೋಪಿ ತಲೆಮರೆಸಿ ಕೊಂಡಿದ್ದು, ಆತನ ಪತ್ತೆಗೆ ಹುಡುಕಾಟ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಬಂಧಿತರಿಂದ 90 ಕೆಜಿ ಏಲಕ್ಕಿ, 228 ಕೆಜಿ ಬಾದಾಮಿ, 25 ಕೆಜಿ ಗೋಡಂಬಿ ಹಾಗೂ ಕದ್ದ ಒಣಹಣ್ಣು ಸಾಗಣೆ ಮಾಡಲು ಬಳಸಿದ್ದ ಕಾರು ಜಪ್ತಿ ಮಾಡಲಾಗಿದೆ. ಇವುಗಳ ಮೌಲ್ಯ ₹6.11 ಲಕ್ಷ ಎಂದು ಅಂದಾಜಿಸಲಾಗಿದೆ.