ಬೆಂಗಳೂರಿನಲ್ಲಿ ₹13.76 ಕೋಟಿ ಮೌಲ್ಯದ ಜಪ್ತಿ ಸ್ವತ್ತು ವಾರಸುದಾರರಿಗೆ ಹಸ್ತಾಂತರ

ಬೆಂಗಳೂರು ದಕ್ಷಿಣ ವಿಭಾಗದ ಪೊಲೀಸರು ಶನಿವಾರ ಆರೋಪಿಗಳಿಂದ ವಶಕ್ಕೆ ಪಡೆದ ವಸ್ತುಗಳನ್ನು ವಾರಸುದಾರರಿಗೆ ಹಸ್ತಾಂತರ ಮಾಡಿದರು. 257 ವಿವಿಧ ಪ್ರಕರಣಗಳಲ್ಲಿ ಭಾಗಿಯಾಗಿದ್ದ 211 ಆರೋಪಿಗಳಿಂದ ಒಟ್ಟು ₹13.76 ಕೋಟಿಯ ಸ್ವತ್ತನ್ನು ಜಪ್ತಿ ಮಾಡಲಾಗಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. ಜಪ್ತಿ ಮಾಡಿದ ವಸ್ತುಗಳಲ್ಲಿ 8 ಕೆ.ಜಿ 269 ಗ್ರಾಂ ಆಭರಣ, 410 ಮೊಬೈಲ್‌ಗಳು, 175 ದ್ವಿಚಕ್ರ ವಾಹನಗಳು, ₹92 ಲಕ್ಷ ನಗದು, 18 ಕೆ.ಜಿ ಬೆಳ್ಳಿ ಆಭರಣ, 15 ಮೂರು ಚಕ್ರದ ವಾಹನಗಳು, ಒಂದು ಕ್ಯಾಂಟರ್‌, 343 ಕೆ.ಜಿ ಒಣ ಹಣ್ಣು, ಏಳು ವಾಹನಗಳು, 22 ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್‌, ಮೂರು ಲ್ಯಾಪ್‌ಟಾಪ್‌, 86 ಕೆ.ಜಿ ಕಾಪರ್ ವೈರ್ ಸೇರಿವೆ.