ಪಾಸ್‌ಪೋರ್ಟ್ ಸೇವಾ ಕೇಂದ್ರ ಮಾರತಹಳ್ಳಿ ನಿಂದ ವೈಟ್‌ಫೀಲ್ಡ್‌ಗೆ ಸ್ಥಳಾಂತರ

ಬೆಂಗಳೂರಿನ ಮಾರತಹಳ್ಳಿ ಹೊರವರ್ತುಲ ರಸ್ತೆಯ ದೇವರಬೀಸನಹಳ್ಳಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಪಾಸ್ ಪೋರ್ಟ್ ಸೇವಾ ಕೇಂದ್ರ (PSK) ತನ್ನ ಸ್ಥಳವನ್ನು ಬದಲಾಯಿಸಿದೆ. ಅಕ್ಟೋಬರ್ 5 ರಿಂದ ಜಾರಿಗೆ ಬರುವಂತೆ ಈ ಕೇಂದ್ರವನ್ನು ವೈಟ್ ಫೀಲ್ಡ್ ನ ಹೊಸ ಕಟ್ಟಡಕ್ಕೆ ಸ್ಥಳಾಂತರಿಸಲಾಗಿದೆ ಎಂದು ಪ್ರಾದೇಶಿಕ ಪಾಸ್ ಪೋರ್ಟ್ ಕಚೇರಿ (RPO) ತಿಳಿಸಿದೆ. ಅಕ್ಟೋಬರ್ 5 ಅಥವಾ ಅದಕ್ಕೂ ನಂತರ ಮಾರತಹಳ್ಳಿ ಕೇಂದ್ರದಲ್ಲಿ ಅಪಾಯಿಂಟ್ ಮೆಂಟ್ ಕಾಯ್ದಿರಿಸಿದ್ದ ಅರ್ಜಿದಾರರು ಇನ್ಮುಂದೆ ಹಳೆಯ ಕಚೇರಿಗೆ ತೆರಳಬಾರದು. ಬದಲಾಗಿ ತಮ್ಮ ಅರ್ಜಿ ರಶೀದಿಯಲ್ಲಿ ನಮೂದಿಸಲಾದ ಅದೇ ದಿನಾಂಕ ಹಾಗೂ ಸಮಯಕ್ಕೆ ವೈಟ್ ಫೀಲ್ಡ್ ನ ನೂತನ ಕೇಂದ್ರಕ್ಕೆ ಹಾಜರಾಗಬೇಕೆಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.