ಎ.ಐ ನೆರವಿನಿಂದ ಖಿನ್ನತೆ ಮೌಲ್ಯಮಾಪನ

ಕೃತಕ ಬುದ್ಧಿಮತ್ತೆ (ಎ.ಐ) ತಂತ್ರಜ್ಞಾನದ ನೆರವಿನಿಂದ ಖಿನ್ನತೆಯನ್ನು ಆರಂಭಿಕ ಹಂತದಲ್ಲಿಯೇ ಪತ್ತೆ ಮಾಡಲು ರಾಷ್ಟ್ರೀಯ ಮಾನಸಿಕ ಆರೋಗ್ಯ ಮತ್ತು ನರವಿಜ್ಞಾನ ಸಂಸ್ಥೆ (ನಿಮ್ಹಾನ್ಸ್‌) ಮುಂದಾಗಿದೆ. ಈ ಸಂಬಂಧ ಸಂಸ್ಥೆಯು ಯೋಜನೆಯನ್ನು ರೂಪಿಸಿದ್ದು, ಐಐಟಿಖರಗ್‌ಪುರ ಹಾಗೂ ತೇಜ್‌ಪುರದ ಲೋಕೋಪ್ರಿಯಾ ಗೋಪಿನಾಥ್ ಬೋರ್ಡೊಲೊಯ್ ಪ್ರಾದೇಶಿಕ ಮಾನಸಿಕ ಆರೋಗ್ಯ ಸಂಸ್ಥೆ (ಎಲ್‌ಜಿಬಿಆರ್‌ಐಎಂಎಚ್) ಜತೆಗೆ ನಿಮ್ಹಾನ್ಸ್ ಒಡಂಬಡಿಕೆ ಮಾಡಿಕೊಂಡಿತು. ಈ ಯೋಜನೆಯಡಿ ಅಂತರರಾಷ್ಟ್ರೀಯ ದತ್ತಿ ಪ್ರತಿಷ್ಠಾನ ವೆಲ್‌ಕಮ್ ಟ್ರಸ್ಟ್‌ನಿಂದ ಧನಸಹಾಯ ಪಡೆದು, ಎರಡು ವರ್ಷಗಳು ಅಧ್ಯಯನ ನಡೆಸಲಾಗುತ್ತದೆ ಎಂದು ನಿಮ್ಹಾನ್ಸ್ ವೈದ್ಯರು ತಿಳಿಸಿದರು. ನಿಮ್ಹಾನ್ಸ್ ಮತ್ತು ಎಲ್‌ಜಿಬಿಆರ್‌ಐಎಂಎಚ್ ಸಂಸ್ಥೆಗಳಲ್ಲಿ 24 ತಿಂಗಳು ಅಧ್ಯಯನ ನಡೆಯಲಿದ್ದು, 4,500 ಕ್ಲಿನಿಕಲ್ ಸಂದರ್ಶನಗಳನ್ನು ನಡೆಸಿ ವಿಶ್ಲೇಷಿಸಲಾಗುತ್ತದೆ ಎಂದು ಲೇಖಾನ್ಶ್ ಶುಕ್ಲಾ ತಿಳಿಸಿದ್ದಾರೆ.