ನಮ್ಮ ಮೆಟ್ರೋ ಪಿಂಕ್ ಮತ್ತು ಬ್ಲೂ ಲೈನ್ ಹೊಸ ಅಪ್ಡೇಟ್: 2027ರ ವೇಳೆಗೆ ಕಾರ್ಯಾಚರಣೆ

ಬೆಂಗಳೂರಿನ ಅತ್ಯುತ್ತಮ ಸಾರಿಗೆ ವ್ಯವಸ್ಥೆಯಾಗಿ ಹೆಸರುವಾಸಿಯಾದ 'ನಮ್ಮ ಮೆಟ್ರೋ' ಯೋಜನೆಯ ಎರಡು ಪ್ರಮುಖ ಮಾರ್ಗಗಳ ಕಾಮಗಾರಿ ಸಾಗುತ್ತಿದೆ. ದಕ್ಷಿಣ ಮತ್ತು ಉತ್ತರ ಬೆಂಗಳೂರನ್ನು ಸಂಪರ್ಕಿಸುವ ಪಿಂಕ್ ಲೈನ್ ಮತ್ತು ಐಟಿ ಹಬ್‌ಗಳನ್ನು ಸಂಪರ್ಕಿಸುವ ಬ್ಲೂ ಲೈನ್ ಪ್ರಾಯೋಗಿಕ ಸಂಚಾರ ನವೆಂಬರ್‌ನಲ್ಲಿ ಆರಂಭವಾಗುವ ಸಾಧ್ಯತೆಯಿದೆ. ಈ ಎರಡೂ ಮಾರ್ಗಗಳನ್ನು 2027ರ ಮೇ ವೇಳೆಗೆ ಸಾರ್ವಜನಿಕ ಸಂಚಾರಕ್ಕೆ ಮುಕ್ತಗೊಳಿಸುವ ಗುರಿ ಬಿಎಮ್ ಆರ್ ಸಿಎಲ್ ಹೊಂದಿದೆ. ಡೈರಿ ಸರ್ಕಲ್‌ನಿಂದ ಶಿವಾಜಿನಗರದವರೆಗಿನ 21 ಕಿ.ಮೀ ಪಿಂಕ್ ಲೈನ್ ಮಾರ್ಗದಲ್ಲಿ ಅಕ್ಟೋಬರ್ ಅಥವಾ ನವೆಂಬರ್ ವೇಳೆಗೆ ಪ್ರಾಯೋಗಿಕ ರೈಲು ಓಡಿಸುವ ಸಿದ್ಧತೆಗಳು ನಡೆಯುತ್ತಿವೆ.