ಮಾನ್ಸಿ ಸಿಂಗ್ ಕೆಬಿಎ ಡೈಮಂಡ್ ಜುಬಿಲಿ ಇಂಡಿಯಾ ಇಂಟರ್‌ನ್ಯಾಷನಲ್ ಚಾಲೆಂಜ್ ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ಮುನ್ನಡೆ

ಭಾರತದ ಮಾನ್ಸಿ ಸಿಂಗ್ ಅವರು ಸ್ವದೇಶದ ಬಾಲಾ ಮಾನ್ವಿತಾ ರೆಡ್ಡಿ ಅವರನ್ನು 21–9, 21–9 ರಿಂದ ಸೋಲಿಸಿ ಕೆಬಿಎ ಡೈಮಂಡ್ ಜುಬಿಲಿ ಇಂಡಿಯಾ ಇಂಟರ್‌ನ್ಯಾಷನಲ್ ಚಾಲೆಂಜ್ ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನ 16ರ ಸುತ್ತಿಗೆ ಮುನ್ನಡೆದರು. ರಾಜ್ಯ ಬ್ಯಾಡ್ಮಿಂಟನ್ ಸಂಸ್ಥೆ ಸಭಾಂಗಣದಲ್ಲಿ ಬುಧವಾರ ನಡೆದ 32ರ ಸುತ್ತಿನ ಇನ್ನೊಂದು ಪಂದ್ಯದಲ್ಲಿ ನಗರದ ತಾನ್ಯಾ ಹೇಮಂತ್ 21–16, 21–10 ರಿಂದ ಚಾಂದನಿ ಕೆ. ಅವರನ್ನು ಹಿಮ್ಮೆಟ್ಟಿಸಿದರು. ಪುರುಷರ ವಿಭಾಗದಲ್ಲಿ ಸ್ಥಳೀಯ ತಾರೆ ಮಿಥುನ್ ಮಂಜುನಾಥ್ 21–17, 21–18 ರಿಂದ ಅಖಿಲ್ ರಾವ್ ಸೂರ್ಯನೇನಿ ಅವರನ್ನು ಸೋಲಿಸಿ 32ರ ಸುತ್ತನ್ನು ತಲುಪಿದರು. ಹತ್ತನೇ ಶ್ರೇಯಾಂಕದ ಪ್ರಣಯ್ ಶೆಟ್ಟಿಗಾರ್ 21–18, 21–16 ರಿಂದ ಅಕ್ಷಯ್ ಕರ್ಡೆ ಅವರನ್ನು ಸೋಲಿಸಿದರು. ಇನ್ನೊಬ್ಬ ಸ್ಥಳೀಯ ಆಟಗಾರ ರಘು ಮರಿಸ್ವಾಮಿ ತೀವ್ರ ಹೋರಾಟದ ನಂತರ 23–21, 12–21, 21–17 ರಿಂದ ಪ್ರಜ್ವಲ್ ಸೋನಾವನೆ ವಿರುದ್ಧ ಜಯ ಸಾಧಿಸಿದರು.