ಇಂಡಿಗೊ ವಿಮಾನದಲ್ಲಿ ಅಪಹರಣದ ಬೆದರಿಕೆ ಪತ್ರ ಪತ್ತೆಯಾದ ಬಳಿಕ ಕೆಐಎಎಲ್‌ನಲ್ಲಿ ವಿಮಾನ ತುರ್ತು ಇಳಿಕೆ

ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಹೊರಟ ಇಂಡಿಗೊ ವಿಮಾನದಲ್ಲಿ ಅಪಹರಣದ ಬೆದರಿಕೆ ಪತ್ರ ಪತ್ತೆಯಾದ ಹಿನ್ನೆಲೆಯಲ್ಲಿ ವಿಮಾನವನ್ನು ತುರ್ತಾಗಿ ಕೆಐಎಎಲ್‌ನಲ್ಲಿ ಇಳಿಸಲಾಗಿದೆ. ಶನಿವಾರ ನಡೆದ ಈ ಘಟನೆಯಿಂದ ಪ್ರಯಾಣಿಕರು ಮತ್ತು ಭದ್ರತಾ ಸಿಬ್ಬಂದಿಯಲ್ಲಿ ಆತಂಕ ಸೃಷ್ಟಿಯಾಗಿತ್ತು. 178 ಪ್ರಯಾಣಿಕರಿದ್ದ 6ಇ-451 ವಿಮಾನದಲ್ಲಿ ಶೌಚಾಲಯದಲ್ಲಿ ಕೈ ಬರಹದ ಬೆದರಿಕೆ ಪತ್ರವೊಂದು ಸಿಬ್ಬಂದಿಗೆ ಸಿಕ್ಕಿದೆ. ಪತ್ರದಲ್ಲಿ 'ಈ ವಿಮಾನವನ್ನು ನಿಖರವಾಗಿ ಸಂಜೆ 6.30ಕ್ಕೆ ಹೈಜಾಕ್‌ ಮಾಡಲಾಗುತ್ತದೆ' ಎಂಬ ಸಂದೇಶ ಬರೆಯಲಾಗಿತ್ತು.