ಕನ್ನಡ ರಾಜ್ಯೋತ್ಸವದ ಅಂಗವಾಗಿ ಎಚ್‌ಎಂಟಿ 'ಕನ್ನಡಿಗ' ಸರಣಿಯ ಕೈಗಡಿಯಾರ ಬಿಡುಗಡೆ

ಕೇಂದ್ರ ಸರ್ಕಾರಿ ಸ್ವಾಮ್ಯದ ಎಚ್‌ಎಂಟಿ ಕಂಪನಿಯು ಕನ್ನಡ ರಾಜ್ಯೋತ್ಸವದ ನಿಮಿತ್ತ ‘ಎಚ್‌ಎಂಟಿ ಕನ್ನಡಿಗ’ ಎನ್ನುವ ಸರಣಿಯ ಕೈಗಡಿಯಾರಗಳನ್ನು ತಯಾರಿಸಿದೆ. ಬೆಂಗಳೂರಿನ ಎಚ್ಎಂಟಿ ಆಟದ ಮೈದಾನದಲ್ಲಿ ಭಾನುವಾರ ಸಂಜೆ ನಡೆಯಲಿರುವ ಕಾರ್ಯಕ್ರಮದಲ್ಲಿ, ಕೇಂದ್ರದ ಬೃಹತ್ ಕೈಗಾರಿಕೆ ಮತ್ತು ಉಕ್ಕು ಸಚಿವ ಎಚ್.ಡಿ.ಕುಮಾರಸ್ವಾಮಿ ಈ ಕೈಗಡಿಯಾರಗಳನ್ನು ಬಿಡುಗಡೆ ಮಾಡಲಿದ್ದಾರೆ. ಚೈನು ಮತ್ತು ಬೆಲ್ಟ್ ನಮೂನೆಗಳಲ್ಲಿ ಲಭ್ಯವಿರುವ ಈ ಕೈಗಡಿಯಾರಗಳ ಬೆಲೆ ₹3,500ರಿಂದ ₹3,600ರವರೆಗೆ ಇರುತ್ತದೆ. ಬೆಲ್ಟ್ ಗಡಿಯಾರಗಳಿಗೆ ಇಟಲಿಯ ಅಪ್ಪಟ ಚರ್ಮದ ಬೆಲ್ಟ್‌ಗಳನ್ನು ಅಳವಡಿಸಲಾಗಿದೆ ಮತ್ತು ಒಂದು ಬೆಲ್ಟಿನ ಬೆಲೆ ₹450 ಆಗಿದೆ.