ಅನುಕಂಪದ ನೇಮಕ ನಿರಂತರ ಹಕ್ಕಲ್ಲ, ಒಂದು ಬಾರಿಯ ಸಹಾನುಭೂತಿ ಮಾತ್ರ: ಹೈಕೋರ್ಟ್‌

ಅನುಕಂಪದ ಆಧಾರದ ನೌಕರಿಯು ಆ ಕುಟುಂಬಕ್ಕೆ ಎದುರಾಗುವ ತಕ್ಷಣದ ಆರ್ಥಿಕ ಸಂಕಷ್ಟ ನಿವಾರಣೆಗಾಗಿ ನೀಡಲಾಗುವ ಒಂದು ಬಾರಿಯ ಸಹಾನುಭೂತಿ ಪರಿಹಾರವೇ ಹೊರತು ಸೌಲಭ್ಯವನ್ನು ನಿರಂತರವಾಗಿ ಪಡೆಯುವ ಹಕ್ಕು ಎನಿಸುವುದಿಲ್ಲ ಎಂದು ಹೈಕೋರ್ಟ್ ಸ್ಪಷ್ಟಪಡಿಸಿದೆ. ಉನ್ನತ ಶೈಕ್ಷಣಿಕ ಅರ್ಹತೆ ಇರುವ ಇಬ್ಬರು ನೌಕರರಿಗೆ ಪ್ರಥಮ ದರ್ಜೆ ಸಹಾಯಕ ಹುದ್ದೆಗೆ ಪರಿಗಣಿಸುವಂತೆ ಕೆಎಟಿ-ಬೆಳಗಾವಿ ನೀಡಿದ್ದ ಆದೇಶವನ್ನು ಧಾರವಾಡದ ವಿಭಾಗೀಯ ನ್ಯಾಯಪೀಠ ರದ್ದುಗೊಳಿಸಿದೆ. ನ್ಯಾಯಮೂರ್ತಿ ಎಂ.ನಾಗಪ್ರಸನ್ನ ನೇತೃತ್ವದ ವಿಭಾಗೀಯ ನ್ಯಾಯಪೀಠ, ವಿದ್ಯಾರ್ಹತೆ ಎಂಬುದು ಹುದ್ದೆಗೆ ಅರ್ಹತೆ ನೀಡುತ್ತದೆಯೇ ಹೊರತು ಅನುಕಂಪದ ಯೋಜನೆಯಡಿ ಆ ಹುದ್ದೆಯನ್ನೇ ಪಡೆಯುವ ಹಕ್ಕನ್ನು ಸೃಜಿಸುವುದಿಲ್ಲ ಎಂದು ತಿಳಿಸಿದೆ. ಅನುಕಂಪದ ನೇಮಕ ಕಾನೂನಿನ ಮಿತಿಗಳಲ್ಲೇ ಕಾರ್ಯ ನಿರ್ವಹಿಸಬೇಕು ಎಂದು ನ್ಯಾಯಪೀಠ ಎಚ್ಚರಿಕೆ ನೀಡಿದೆ.