ಬಾಡಿಗೆ ಪಾವತಿಯ ವಿಚಾರಕ್ಕೆ ಗಲಾಟೆ ವಕೀಲ ಮಂಜುನಾಥ್ ಕೊಲೆ: ಆರೋಪಿಗಳ ಪತ್ತೆಗೆ 8 ತಂಡ ರಚನೆ

ಬಾಡಿಗೆ ಪಾವತಿಯ ವಿಚಾರಕ್ಕೆ ಗಲಾಟೆ ವಕೀಲ ಮಂಜುನಾಥ್ (42) ಅವರ ಹಣೆ, ಎದೆಗೆ ಗುಂಡಿಕ್ಕಿ ಕೊಲೆ ಮಾಡಿದ್ದ ಬಾಡಿಗೆದಾರರ ಪತ್ತೆಗೆ ಎಂಟು ವಿಶೇಷ ಪೊಲೀಸ್‌ ತಂಡ ರಚಿಸಲಾಗಿದೆ. ಪಟ್ಟಂದೂರು ಅಗ್ರಹಾರ ನಿವಾಸಿ ಮಂಜುನಾಥ್‌ ಅವರನ್ನು ಅಕ್ಟೋಬರ್ 18ರಂದು ಆರೋಪಿಗಳು ಕೊಲೆ ಮಾಡಿ ಪರಾರಿ ಆಗಿದ್ದರು. ವೈಟ್‌ಫೀಲ್ಡ್ ವಿಭಾಗದ ಡಿಸಿಪಿ ಸೈದುಲ್ಲಾ ಅಡಾವತ್ ಅವರು, ಕೊಲೆ ಪ್ರಕರಣದಲ್ಲಿ ಭಾಗಿಯಾಗಿರುವ ಇಬ್ಬರು ಆರೋಪಿಗಳನ್ನು ಗುರುತಿಸಲಾಗಿದೆ. ಇಬ್ಬರೂ ಬಿಹಾರ ರಾಜ್ಯದವರು ಎಂಬುದು ಪತ್ತೆಯಾಗಿದೆ. ಕಳೆದ ಎರಡು ವರ್ಷಗಳಿಂದ ಬೆಂಗಳೂರಿನಲ್ಲಿ ಡೆಲಿವರಿ ಬಾಯ್‌ಗಳಾಗಿ ಆರೋಪಿಗಳು ಕೆಲಸ ಮಾಡುತ್ತಿದ್ದರು ಎಂದು ತಿಳಿಸಿದ್ದಾರೆ. ತನಿಖೆಗೆ ರಚಿಸಿರುವ ಎಂಟು ತಂಡಗಳು ದೆಹಲಿ, ಕೋಲ್ಕತ್ತ, ಬಿಹಾರ, ಚೆನ್ನೈ ಮತ್ತು ಹೈದರಾಬಾದ್ ಸೇರಿ ಹಲವು ನಗರಗಳಲ್ಲಿ ಶೋಧ ನಡೆಸಿವೆ.