ನಮ್ಮ ಮೆಟ್ರೋದ ಎತ್ತರಿಸಿದ ವಿಭಾಗದ ಸಿಎಂಆರ್‌ಎಸ್ ಪರಿಶೀಲನೆ ಪೂರ್ಣ

ನಮ್ಮ ಮೆಟ್ರೋದ ಗುಲಾಬಿ ಮಾರ್ಗದಲ್ಲಿ ಕಾಳೇನ ಅಗ್ರಹಾರದಿಂದ ತಾವರೆಕೆರೆವರೆಗಿನ 7.5 ಕಿ.ಮೀ. ಉದ್ದದ ಎತ್ತರಿಸಿದ ವಿಭಾಗದ ಸುರಕ್ಷತಾ ತಪಾಸಣೆಯನ್ನು ದಕ್ಷಿಣ ವಲಯದ ಮೆಟ್ರೊ ರೈಲ್ವೆ ಸುರಕ್ಷತಾ ಆಯುಕ್ತ (ಸಿಎಂಆರ್‌ಎಸ್) ವಿ. ವೆಂಕಟಸುಬ್ರಮಣಿಯನ್ ತಂಡ ಗುರುವಾರ ಪೂರ್ಣಗೊಳಿಸಿದೆ. ಸಿಎಂಆರ್‌ಎಸ್‌ ಅನುಮತಿ ಪತ್ರ ನೀಡಿದ ಮೇಲೆ ಚಾಲನಾ ಪ್ರಕ್ರಿಯೆಗಳು ಆರಂಭಗೊಳ್ಳಲಿವೆ. ಈ ಎತ್ತರಿಸಿದ ವಿಭಾಗವು ಕಾಳೇನ ಅಗ್ರಹಾರ, ಹುಳಿಮಾವು, ಐಐಎಂಬಿ, ಜೆ.ಪಿ. ನಗರ 4ನೇ ಹಂತ, ಜಯದೇವ ಆಸ್ಪತ್ರೆ ಮತ್ತು ತಾವರೆಕೆರೆ ಸೇರಿದಂತೆ ಒಟ್ಟು ಆರು ನಿಲ್ದಾಣಗಳನ್ನು ಒಳಗೊಂಡಿದೆ. ಈ ಎತ್ತರಿಸಿದ ವಿಭಾಗವು ಸಾರ್ವಜನಿಕ ಸಂಚಾರಕ್ಕೆ ಮುಕ್ತಗೊಂಡ ನಂತರ, ನಮ್ಮ ಮೆಟ್ರೋ ಪ್ರಸ್ತುತ ಕಾರ್ಯಾಚರಣೆ ಯಲ್ಲಿರುವ 96.10 ಕಿ.ಮೀ. ಮಾರ್ಗದ ಉದ್ದವು 103.60 ಕಿ.ಮೀ.ಗೆ ವಿಸ್ತರಣೆ ಯಾಗಲಿದೆ.