ಬಾಲಕನ ಮೇಲೆ ದೈಹಿಕ ದೌರ್ಜನ್ಯ: ಹೋರಾಟ ಎಚ್ಚರಿಕೆ
ಹೊಸಕೋಟೆಯಲ್ಲಿ ಮದರಸೊಂದರಲ್ಲಿ 10 ವರ್ಷದ ಬಾಲಕನ ಮೇಲೆ ದೈಹಿಕ ದೌರ್ಜನ್ಯ ನಡೆದಿದೆ ಎಂಬ ಆರೋಪಗಳು ಹೊರಬಂದಿವೆ. ಮದರಸದಲ್ಲಿ ಇಬ್ಬರು ಯುವಕರು ಬಾಲಕನ ಬಾಯಿಗೆ ಬಟ್ಟೆ ಕಟ್ಟಿ ದೌರ್ಜನ್ಯ ಎಸಗಿ, ಈ ವಿಷಯ ಬಯಲಿಗೆ ಬಂದರೆ ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿದ್ದಾರೆ ಎಂದು ಆರೋಪಿಸಲಾಗಿದೆ. ಬೆಂಗಳೂರು ಮಂಗಮ್ಮನ ಪಾಳ್ಯದ ನಿವಾಸಿಯಾಗಿರುವ ಬಾಲಕನ ತಾಯಿ, ಮಗನಿಗೆ ಓದು-ಬರಹ ಬಾರದಿರುವುದನ್ನು ಗಮನಿಸಿ ಕಳೆದ ಏಪ್ರಿಲ್ನಲ್ಲಿ ಬನ್ನೇರುಘಟ್ಟದ ಬಳಿ ಇನ್ನೊಂದು ಮದರಸಕ್ಕೆ ಸೇರಿಸಿದ್ದರು. ಆ ಮದರಸ ಮುಖ್ಯಸ್ಥರು ದೂರವಾಣಿ ಕರೆ ಮಾಡಿ ಬಾಲಕನ ಮೇಲೆ ದೌರ್ಜನ್ಯವಾಗಿದೆ ಎಂದು ತಿಳಿಸಿದ ನಂತರ ಪ್ರಕರಣ ಗೊತ್ತಾಗಿದೆ. ಸಂತ್ರಸ್ತ ತಾಯಿ ಸೆ.28ರಂದು ಅನುಗೊಂಡನಹಳ್ಳಿ ಪೊಲೀಸ್ ಠಾಣೆಯಲ್ಲಿ ದೂರು ಸಲ್ಲಿಸಿದ್ದಾರೆ. ಇಬ್ಬರು ಯುವಕರು, ಮದರಸ ಮುಖ್ಯಸ್ಥ, ಇಬ್ಬರು ಸದಸ್ಯರು ಹಾಗೂ ಒಬ್ಬ ಡಯಾಗ್ನೋಸ್ಟಿಕ್ ವೈದ್ಯರ ವಿರುದ್ಧ ಪೋಕ್ಸೊ ಅಡಿ ಎಫ್ಐಆರ್ ದಾಖಲಾಗಿದೆ. ದೂರು ದಾಖಲಿಸಲು ಪೊಲೀಸರು ಹಿಂದೇಟು ಹಾಕಿದ್ದಾಗಿ ಸಂತ್ರಸ್ತ ಬಾಲಕನ ತಾಯಿ ಆರೋಪಿಸಿದ್ದಾರೆ. ಎಸ್ಪಿಗೆ ದೂರು ನೀಡಿದ ನಂತರ ಪ್ರಕರಣ ದಾಖಲಾಗಿದೆ. ಶ್ರೀರಾಮ ಸೇನೆ ಮುಖ್ಯಸ್ಥ ಪ್ರಮೋದ್ ಮುತಾಲಿಕ್ ಅವರು ತಹಶೀಲ್ದಾರ್ ಮತ್ತು ತಾಲ್ಲೂಕು ಪೊಲೀಸ್ ವರಿಷ್ಠ ಅಧಿಕಾರಿಗೆ ಮನವಿ ಸಲ್ಲಿಸಿ, ‘10 ದಿನಗಳೊಳಗೆ ಎಲ್ಲ ಆರೋಪಿಗಳನ್ನು ಬಂಧಿಸಬೇಕು. ಇಲ್ಲದಿದ್ದರೆ ರಾಜ್ಯದಾದ್ಯಂತ ಹೋರಾಟ ತೀವ್ರಗೊಳಿಸುವುದಾಗಿ’ ಎಚ್ಚರಿಕೆ ನೀಡಿದರು. ‘ಸಂತ್ರಸ್ತ ಕುಟುಂಬಕ್ಕೆ ರಕ್ಷಣೆ, ಮದರಸ ಮತ್ತು ಡಯಾಗ್ನೋಸ್ಟಿಕ್ ಸೆಂಟರ್ ವಿರುದ್ಧ ತನಿಖೆ, ಮಕ್ಕಳ ಆರೋಗ್ಯ ತಪಾಸಣೆ ಹಾಗೂ ದೂರು ದಾಖಲಿಸಲು ಹಿಂದೇಟು ಹಾಕಿದ ಪಿಎಸ್ಐ ಅಮಾನತುಗೊಳಿಸಬೇಕೆಂದು ’ ಆಗ್ರಹಿಸಿದರು.


