ಬೆಂಗಳೂರು ರಸ್ತೆಗಳಲ್ಲಿ ಕಸ, ಗುಂಡಿ, ಒತ್ತುವರಿ ಪತ್ತೆಗೆ ಎಐ ಕಣ್ಗಾವಲು

ಬೆಂಗಳೂರು ರಸ್ತೆಗಳಲ್ಲಿ ಕಸ ಮತ್ತು ಇತರ ಸಮಸ್ಯೆಗಳನ್ನು ಪತ್ತೆಹಚ್ಚಲು ಎಐ ತಂತ್ರಜ್ಞಾನ ಬಳಸುವ ಕುರಿತು ಗ್ರೇಟರ್ ಬೆಂಗಳೂರು ಪ್ರಾಧಿಕಾರ ಆಯುಕ್ತ ಎಂ. ಮಹೇಶ್ವರ ರಾವ್ ಅವರು ಮಾರ್ಷಲ್‌ಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದ್ದಾರೆ. ಒಟ್ಟು 311 ಕಿ.ಮೀ ರಸ್ತೆಗಳಲ್ಲಿ 150 ಕಿ.ಮೀ ರಸ್ತೆಯಲ್ಲಿ ಪ್ರಾಯೋಗಿಕವಾಗಿ ಎಐ ಕ್ಯಾಮೆರಾ ಅಳವಡಿಸಿ ಸಮೀಕ್ಷೆ ನಡೆಸಲಾಗಿದೆ. ಚಿತ್ರಗುಪ್ತ ಅರ್ಬನ್ ಟೆಕ್ನಾಲಜೀಸ್ ಸಹಯೋಗದ ಈ ಸಮೀಕ್ಷೆಯು ಬ್ಲಾಕ್ ಸ್ಪಾಟ್, ರಸ್ತೆಗುಂಡಿ, ಫುಟ್‌ಪಾತ್ ಒತ್ತುವರಿ, ಕಟ್ಟಡ ತ್ಯಾಜ್ಯ, ಅನಧಿಕೃತ ಆಪ್ಟಿಕಲ್ ಫೈಬರ್ ಕೇಬಲ್ ಮತ್ತು ಬೀದಿದೀಪ ಸಮಸ್ಯೆಗಳನ್ನು ಸ್ವಯಂಚಾಲಿತವಾಗಿ ಗುರುತಿಸುತ್ತದೆ. ಈ ಸಮೀಕ್ಷೆಯಲ್ಲಿ ಒಟ್ಟು 2000 ಟಿಕೆಟ್‌ಗಳು ಕ್ರಿಯೇಟ್ ಆಗಿದ್ದು, ಕಸ ಮತ್ತು ಕಸದ ಬ್ಲಾಕ್ ಸ್ಪಾಟ್‌ಗೆ ಸಂಬಂಧಿಸಿದ 1000 ಟಿಕೆಟ್‌ಗಳನ್ನು 10 ದಿನದೊಳಗೆ ಮುಚ್ಚಲು ಆಯುಕ್ತರು ಮಾರ್ಷಲ್‌ಗಳಿಗೆ ಡೆಡ್‌ಲೈನ್ ನೀಡಿದ್ದಾರೆ.