ನಟಿ ಛಾಯಾ ಸಿಂಗ್‌ಗೆ ಜೀ ಕುಟುಂಬ ಅವಾರ್ಡ್ಸ್ ವೇದಿಕೆಯಲ್ಲಿ ಅಚ್ಚರಿ ಉಡುಗೊರೆ
ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ‘ಅಮೃತಧಾರೆ’ ಧಾರಾವಾಹಿಯ ಭೂಮಿಕಾ ಪಾತ್ರಧಾರಿ, ನಟಿ ಛಾಯಾ ಸಿಂಗ್ ಅವರಿಗೆ ‘ಜೀ ಕುಟುಂಬ ಅವಾರ್ಡ್ಸ್’ ವೇದಿಕೆಯಲ್ಲಿ ಅಚ್ಚರಿಯ ಉಡುಗೊರೆಯೊಂದು ಸಿಕ್ಕಿದೆ. ಕ್ರೇಜಿ ಸ್ಟಾರ್ ವಿ. ರವಿಚಂದ್ರನ್ ಅವರಿಂದ ನೆಚ್ಚಿನ ನಟಿ ಪ್ರಶಸ್ತಿ ಸ್ವೀಕರಿಸಲು ವೇದಿಕೆಗೆ ಆಗಮಿಸಿದ್ದ ಛಾಯಾ ಸಿಂಗ್, ಧಾರಾವಾಹಿ ಚಿತ್ರೀಕರಣಕ್ಕಾಗಿ ಕುಟುಂಬದಿಂದ ದೂರವಿದ್ದು ಚೆನ್ನೈ ಹಾಗೂ ಬೆಂಗಳೂರು ನಡುವೆ ನಿರಂತರ ಪ್ರಯಾಣ ಮಾಡುತ್ತಿರುವ ಕುರಿತು ಮಾತನಾಡುತ್ತಿದ್ದರು. ಇದೇ ವೇಳೆ, ಅವರ ಪತಿ ಕೃಷ್ಣ ಅವರು ಸದ್ದಿಲ್ಲದೆ ವೇದಿಕೆಗೆ ಆಗಮಿಸಿ ಛಾಯಾ ಸಿಂಗ್ ಅವರ ಹಿಂದೆ ಬಂದು ನಿಂತಿದ್ದಾರೆ. ದಿಢೀರನೆ ಪತಿಯನ್ನು ಕಂಡ ನಟಿ ಛಾಯಾ ಸಿಂಗ್ ಅವರು ಭಾವುಕರಾಗಿ ಅಪ್ಪಿಕೊಂಡು ಕಣ್ಣೀರಿಟ್ಟರು. ‘ಅಮೃತಧಾರೆ ಧಾರಾವಾಹಿ ಆರಂಭವಾದ ದಿನದಿಂದಲೂ ಇವರು ಒಬ್ಬಂಟಿಯಾಗಿ ಕಾಲ ಕಳೆಯುತ್ತಿದ್ದಾರೆ. ನಿಮ್ಮ ಬೆಂಬಲದಿಂದಲೇ ನಾನು ಈ ಮಟ್ಟಕ್ಕೆ ಬೆಳೆಯಲು ಸಾಧ್ಯವಾಯಿತು’ ಎಂದು ಪತಿಯನ್ನು ಸ್ಮರಿಸಿದರು. ಬಳಿಕ ಈ ವಿಶೇಷ ಕ್ಷಣದಲ್ಲಿ ಜೀ ಕನ್ನಡ ವಾಹಿನಿಯ ಪರವಾಗಿ ನಟಿ ಛಾಯಾ ಸಿಂಗ್ ಅವರಿಗೆ ಮುದ್ದಾದ ನಾಯಿ ಮರಿಯೊಂದನ್ನು ಗಿಫ್ಟ್‌ ಆಗಿ ನೀಡಲಾಯಿತು. ಈ ಅಚ್ಚರಿಯ ಉಡುಗೊರೆಯನ್ನು ಕಂಡು ನಟಿ ಸಂತಸ ವ್ಯಕ್ತಪಡಿಸಿದರು.
